Questions frequentas
Trobaretz çai-jos las responsas a las questions mai frequentas sul projècte de la Foncièra Cevenòla e l’achat de la bòria del Cambon.
Quant còsta l’achat de la bòria del Cambon ?
La bòria es venduda 180 000 € als quals s’ajustan los fraisses de notari.
Quin es lo còst total del projècte ?
200 000 € d’achat e a l’entorn de 200 000 € de trabalhs.
Per l’apèl al don, un montant de 70 000 € es anonciat, cossí anatz finançar lo demai de l’achat ?
Lo venteire, Longo Maï, nos fa un crèdit venteire jos forma de mensualitats sus 15 ans.
Per finançar los trabalhs, anam tanben recórrer a de prèsts associatius, un emprunt bancari, e de subvencions. Rembossarem los empruntses gràcias als loguièrs qu’encaissarem (lotjament, Tèrç Luòc) e a las animacions, aculhs e estagis organizats sul luòc.
Qué va venir mon don se finalament la bòria del Cambon es pas achetada ?
Farem tot per que la bòria siá achetada. Se çaquelà èra pas lo cas, vòstres dons seràn utilizats per un autre achat en Cevenas. En efièch, delà de la bòria del Cambon, volèm que nòstra estructura venga una foncièra solidària per las Cevenas.
En tant que donator, pòdi participar a la governança de la bòria del Cambon e de la foncièra ?
Finalizam actualament l’elaboracion de la governança, dins la quala una plaça serà reservada als donators, probablament dins un collègi dedicat.
Cossí va èsser organizada la governança de la foncièra ?
Trabalham actualament lo subjècte per metre en plaça una governança que siá la mai orizontala possibla, amb un conselh collegial coma organe de governança e de gestion de l’associacion.
Las diferentas partidas prenentas (fondators, abitant·as, païsan·as, donator·ritz, partenaris, etc.) auràn una plaça dins aquesta governança, perque nòstre objectiu es de far de la foncièra e de la bòria del Cambon de communs pel territòri. Per aquò, volèm dobrir las decisions estrategicas e la gestion a las personas interessadas e motivadas.
Dins quant de temps lo projècte va èsser operacional ?
L’aquisicion de la bòria del Cambon serà l’acte 1 de la foncièra. Aquò se deuriá far pendent l’ivèrn 2026-2027, perque l’objectiu es de signar lo compromés de venda abans la fin de 2026.
La mesa en plaça de païsan·as se farà tre la primièra annada aprèp l’aquisicion, coma las activitats del Tèrç Luòc, que lor volum aumentarà progressivament sus qualques annadas.
Un còp aqueste projècte plan engatjat, poirem soscar a l’achat d’autres luòcs !
Prefeririái prestar puslèu que far de dons, es possible ?
Aquesta possibilitat es a l’estudi e veirà lo jorn tre aqueste auton. Podètz prene contacte amb nosautres per obténer mai de detalhs sus las modalitats de prèst previstas.
Anonciatz que l’achat de la bòria del Cambon es l’acte 1 de la foncièra, quinas seràn las etapas seguentas ?
Se l’acte 1 es una capitada e nòstra energia intacta, l’idèa es d’achetar d’autras proprietats agricòlas (bòrias, tèrras agricòlas, forestièras, bastit agricòla, autra dinamica territoriala) per las metre a disposicion de portaires de projèctes sul territòri, jos forma de locacion.
Cossí pòdi participar coma benevòl al projècte ?
Venir benevòl es possible siá en vos investissent dins l’estructura portaira o dins la mesa en plaça de la foncièra, siá pendent los chantièrs participatius suls luòcs achetats, que seràn nombroses. Lo benevolat farà tanben partida de las activitats de l’estructura gestionària de la bòria del Cambon, notadament per l’animacion del luòc e d’autras accions collectivas.
La foncièra s’apièja sus una diversitat de competéncias e de chantièrs : gestion e seguit del foncièr, questions juridicas e administrativas, partenariats e relacional amb d’autras estructuras localas e regionalas, recèrca de finançaments, comunicacion e sensibilizacion, mobilizacion ciutadana, governança e vida associativa, organizacion d’activitats e d’eveniments, etc.
Esitetz pas a nos contactar per ne saber mai suls projèctes en cors e descobrir cossí podètz contribuir. Cada contribucion pòt trobar sa plaça dins la construccion e la perennizacion del projècte foncièr.
En defòra de las tres associacions iniciatritz del projècte, quins son vòstres partenaris ?
Avèm de ligams amb fòrça associacions, collectius e professional·as del territòri, que los activarem per desvolopar e far viure lo projècte de la bòria del Cambon. Avèm ja integrat la ret dels Tèrces Luòcs d’Occitània La Rosée, qu’a un grop « Tèrces Luòcs noiriguièrs ».
Per l’estructuracion de la foncièra, sèm notadament acompanhats pel Tèrç Luòc La Soierie a Lasalle e lo punt d’apèl a la vida associativa del Gard (ACEGAA). Prenèm regularament de conselhs del costat d’autras estructuras : Villages Vivants, la foncièra J’Enracine, Terre de Liens, l’Addearg, de notaris, etc.
Es l’associacion (la foncièra) que va organizar la vida sus la bòria del Cambon e suls autres luòcs ?
Non, la foncièra a coma vocacion principala de gerir de bens foncièrs e de velhar al respècte dels objectius que s’es fixats l’associacion e de las valors que l’an fondada. Es previst qu’una autra estructura siá messa en plaça rapidament aprèp l’achat per gerir la bòria del Cambon al quotidian. La foncièra se consacrarà alara a cercar d’autres bens complementaris que correspondon a sos objectius !
Quina es la diferéncia amb la foncièra Terre de Liens (estructura nacionala dedicada a l’aquisicion e a la preservacion de bòrias, en defendent l’agricultura biologica) ?
Las doas aproches son complementàrias : Terre de Liens agís a l’escala nacionala, mentre que nòstra foncièra cèrca de bastir un otís collectiu de mestresa e de transmission del foncièr agricòl a l’escala locala, en Cevenas. Los avèm rencontrats e avèm soscat ensems a l’interès d’aquesta complementaritat. La multiplicacion pertot en França de las foncièras solidàrias localas, a las qualas Terre de Liens forniss fòrça ressorsas, mòstra l’importància de desvolopar aquestes otisses pels territòris.